Lirthei khalhtute fimkhur a ṭul

Mizoram sorkar chuan kumin September 1 aṭang Motor Vehicles (Ammendment) Act, 2019 chu a hmang ṭan a, he dan hman hnu October thla chhung bik khan lirthei hmanga dan bawhchhia mi 871 man an ni a, an pawisa chawi belh khawm chu Rs 5,35,800 a tling.

Mizoram sorkarin lirthei chungchangah dan khauh zawk a hmang a, hei hian a tirah sawisel a hlawh hle a, sorkar berin a hman miau avangin danin a phût anga awm hi mipui tih tur a ni.

Dan a khauh tak sawt thu hriat a ni lo a, dan bawhchhia chawi erawh a pung sawt thung a, hei vang tak hian dan zawm ṭhatzia a chiang lehzual a ni.

State tam takin Motor Vehicles (Ammendment) Act, 2019 hi an hmang duh lo a, chawi a tam em avang leh mipui khuahkhirhna a nasat avangin an duh lo. A tirah state panga bakin an kalpui lo a, state ṭhenkhat chuan an kalpui lo mai ni loin an dodal bawk a, Mizoram sorkar pawhin hreh tak chungin an kalpui niin sorkar lam chuan an sawi nghe nghe a ni.

Sorkar laipui hian thil tam tak ti turin state-ah a ngen ṭhin a, a barh luih theih erawh a ni lo. Motor Vehicles (Ammendment) Act, 2019 pawh hi hmang turin a ngen thei a, a nawr pawh a ni thei a, a tilui thei lo thung. Tunah hian kan sorkarin he dan khauh tak hi a hmang ta a, in sawifiah chungin a kalpui ṭan a ni.

Thla khat chhunga Rs 5,35,800 a lakluh theih chuan 'no tolerance week' angte a kalpui leh a nih phei chuan mipui hnen aṭangin kum khatah nuai 60 chuang daih sorkarin sum a hmuh belh thei dawn niin a lang.