CYMA leh Mizoram kawngpui

Tun hnai khan Central YMA leh Mizoram PWD-te chuan an thawhhona thuthlung (MoU) sawiho a, YMA leh PWD lam hotu liante an kal ṭha hle. Sub-Hqrs leh Group YMA hruaituten an huam chhunga inkalpawhna kawnga harsatna hrang hrang an tawh dante sawiin hma lak mekna leh hma lak tum a nih leh nih lohte an zawt hlawm a ni.

Mizoram kawng­pui dinhmun chu sawi ngai loin a taka hmutu kan ni a. Kan kawngpui pawimawh ber berte pawh zawh harsa khawpa a chhiat châng a awm fo a, kawngpui chhia avanga lungawi lohna lantir pawh an awm hial a ni. Hei vang hian kan kawngpuite hian enkawltu, duattu leh ngaihventu a mamawh takzet a ni.

Kum 2017-a YMA General Conference-ah khan, “Mizoram hmun hrang hranga inkalpawhna kan neihte hi tun aia ṭha leh changtlung zawka siam a nih theih nan Central YMA-in hma la rawh se” tih rel a ni tawh a, he mi bawhzui hian kum 2018 khan thawhhona thuthlung ziah a lo ni tawh bawk a, rah ṭha tak tak a chhuah tawh ngei ang.

Hetihlai hian Central YMA meuh­in kawngpui chhia a veiin a siamna lam thlengin a vilpui ta a, kawngpui ṭha leh tlo zawk kan neih a beiseiawm tehlul nen tuna kan ram kawngpui dinhmun thlir hian lung a awi lo hle a ni.

CYMA pawhin ring an rawlh ta sâ sâ kawngpui ṭha tak kan neih tak tak theihna turin huaisen takin hma la ngam se, sorkar pawhin ṭan la zual se, kawngpui nei chhia state kan nih reng bîk loh hlan a nghahhlelhawm tawh e.