CM nge Congress dawt sawi zawk?

Mizoram Pradesh Congress Committee (MPCC) Media depart­ment chuan, CM Zoramthanga'n July 14, 2020-a TV-a thuchah a sawiah, Mizoram State Sports Council (MSSC) hnuaia contract tam tak pek chhuah chungchang a sawifiahnaa MSSC hnuaia hna pekte tihdanglam theih tawh lo anga a sawi chu thu dik a ni lo tih sawiin, "Dan hmangin CM leh Finance department-in an tihdanglam theih a awm," an ti. CM-in MSSC hnuaia hna pekte sorkar laipui aṭanga a hman­na tur awm sa vek a tih chu, "MSSC hnuaia work order pek chhuah cheng nuai 825 zinga a zatve aia tam, cheng nuai 479 kha SEDP hnuaia mi a ni," tiin Congress media lam hian an chhâng a; cheng nuai 195 senna tur, Serchhip Leisekawt Field siamna atana work order tihchhuah pawh Assembly session-a zawhna leh chhanna aṭang chuan SEDP sum a ni a; North Vanlaiphai football field-a pavillion sakna sum nuai 47.61 pawh SEDP sum a ni bawk. 

Congress lamin kan chief minister leh Finance enkawltu ni bawkin MSSC hnuaia hna pek a sawifiahna dik lohna nia an hriat an hai lang ta hi thil ngaihtuah zui tur tam tak siamtu a ni chho ngei ang. Congress hian thu phuahchawp leh dawt hmanga chief minister meuh tihmualpho tuma an phuahchawp a nih chuan sorkar tan chuan court-ah hial kalna tur chi a nih hmel a, chuti loa Congress lam hian thu dik an phawrh chhuak a nih si chuan chief minister insawifiahnate hi document ṭha tak nei intiin an hnial thla zel a ni ber mai. 

A changtu minister pawh ni lo, state pakhat chief minister meuhin MSSC hnuaia hna pek dan a rawn sawifiah chiam mai hian politics ngaihventute mak tih a hlawh viau a, chumi piah lamah CM-in MSSC hnuaia hna pek dan a sawifiahna chu politics-a thil chik mite leh hna inpek dan kalphung hre chiangtute sawi a hlawh hle. CM hian ama hriatthiam dan hmanga a chhang a nih chuan thil hriat fuh loh palh a nei a nih pawhin amahah a tawp a ni mai dawn a; nimahsela tute'n emaw an hmai phih fai an tumna lamah CM meuh hi thu dik lo hmanga thil an sawifiahtir a nih ngat chuan sorkar tan a mualphothlak a, MNF party tan pawh a thinurthlak thei hial awm e. 

Mizoramah hian politics thil a nih tawh chuan thu dik famkim lo pawh thiam channa atana sawi mai hi an lo ching tawh ṭhin a, politics-ah chuan 'chhang pial thiam' tihte chu politics khel thiam anga sawi a lo ni tawh ṭhin. Tunah erawh zawi zawiin kan politics thlir dan a inthlak chho mek a, RTI Act-te ṭangkai taka hman a ni tawh a, social media lamah kan hotute thusawi pawh dah ṭhat a ni chho zel tawh bawk a, tun hma anga 'chhan pial' mai maia tawp tur a ni tawh lo. 

'MSSC hnate hi sorkar laipui aṭanga hmanna tur awm sa vek a ni nge ni lo?' tih hi politics ngaihven ve lem lo ṭhalaite pawh hian hriat an duh a; 'Congress Media department leh kan chief minister zingah hian a tu zawk hi nge dawt sawi?' tih hi ṭhalaite zawhna a ni - he zawhna chhanna hi Mizo ṭhalaite'n an nghak a, politics-a engkim a thiang anga ngaia dawta inpuh tawnna hi tawp tawh se, thu dik chauh hi i sawi mai ang u.