Larsap thusawi leh contract hna

Mizoram Larsap chuan tun hnai khan Mamita JNV School tur sak meka tlawhnaah thu sawiin, "Fûr ruahtui tam leh kawng chhia hi in sak hna muan lutuk chhanah puh a fuh lo. Mizoram sik leh sa hre chiangtute chuan an hnathawh hun chhung leh ṭan lak hun turte chiang takin an hre sa vek a ni," a ti a; contractor-te thuneitute chu hna a zawh thuai theihna tura ṭan la turin a chah.

Mizoram hi ruah tui tlak tamna ram a ni a, kum khata hnathawh theih loh hun chhung hi a tam hle. Chumi piah lamah inkal pawhna kawng a ṭha lo a, in sâ turte leh construction hna lian thawk tán chuan bungraw phurh kawngah harsatna lian tak an tawk ngei ang tih a chiang a. A taka hnathawktute hian hetiang harsatna hi an hre chiang ber a, thil buaithlak tam tak hi a awm ṭhin a ni.

Hetihlai hian kan Larsap thusawi hi thil dik tak a ni ve bawk a, sum tam tak senga hnathawktute hian an hnathawhna hmun tur hi chu an hre bel a, harsatna awm thei pawh a hmain an hmù lawk thiam vek ang. Hei vang hian an inhmakhua thiam tur a ni a, mipuiin an nghahhlelh project lian tak tak a huna sak zawh hman loh hi a tam hle.

Hetihlai hian hnathawktute tán pawh fur laia thawh hleihtheih loh khawpin kan kawng­puite hi a chhe ve bawk a ni. Mamit District lam pawh hi a tuartu zinga mi an ni a, hun rei tak chhung bungrua leh hmanraw lian tham phurh ngam lohin kawng a chhia a ni.

Engpawhnise kan Larsapin kan rama kan mu tán pakhat huaisen taka a rawn au chhuahpui hi thil lawmawm lam a ni. Hei hi thuneitute lam pawhin huaisen taka an bawhzui theihna turin contractor-te nen innel lutuk lo deuh se, inhau leh invil tak tak ngam tur chuan mi dik leh huaisen nih tel a ṭul si ṭhin.