Hnam dang chhinchhiah hun remchang
Hnahthiala police leh Joint YMA ṭangkawp chuan Covid-19 hripui darh zel tur vênna atan Hnahthiala hnam dang awmte ko khawmin, inner line permit (ILP) an endik a, an thla laksakin, identity card (ID) an siamsak dawn. Aizawla veng eng emaw zat chuan an veng huam chhunga hnam dang awmte dap chhuakin ID hi an siamsak tawh a, hei hi Covid-19 hri laka invenna atana tih a ni.
Mizoramah hian Mizote ni lo hnam dang awm hi khap a ni lo a, dan ang thlapa an awm erawh a ngai thung. Hetihlai hian Mizoram chhungah hna hrang hrang thawkin hnam dang dan loa lo lut tam tham tak an awm a, heng zinga eng emaw zat hi Covid-19 hripui leng mek avangin an ram lamah an haw darh mek a ni.
Tun hi Mizoram tan dan loa hnam dang awm dap chhuahna hun remchang ṭha tak a ni a, dan anga awmte pawh fel taka chhinchhiah hun remchang a ni bawk ang. Hnam dang hrim hrim hi an hnawk lo a, en hran tur pawh an ni lo a; nimahsela dan loa hnam dang lo lut erawh dan anga an ram lama thawn haw zel hi Mizoram leh Mizote tan thil ṭha zawk a nih hmel.
Tunah hian hnam dangte mahni in lama an hawlai a ni a, awlsam takin Mizoramah an luh theih loh hunlai a ni chiah bawk a, mahni huam chhunga hnam dang awmte fel taka chhinchhiah an nih chuan dan loa Mizorama hnam dang lo lutte hi awlsam taka dap chhuah theih an ni ang.
Tun hi dan loa awm hnam dangte dap chhuah hun remchang a nih piah lamah dan loa lut turte laka invenna hun ṭha a ni a, Mizo mipuite'n he hripui avanga harsatna kan tawh hi hnam anga kan himna turin ṭangkai takin i hmang hlauh ang u.