Kan zavaia fimkhur tlan a ngai
Tun hnaia Covid-19 positive hmuh chhuah thar pakhat chu swab sample test result a nghahlaiin an lo inkhel a, Covid-19 vei a ni tih hmuh chhuah a nih hnuah veng pahnihin fimkhur thilah lockdown an puang a, a inkhelhpuite leh an inkhelhna hmuna a hnu lama inkhelte pawh chhui zui an ni a, inkhung hrantir an ni.
Covid-19 hri hi kan la hriat ngai loh ngang a ni a, a zia a dangin a buaipui pawh a hautak. Thil chinchang hre lo deuhte mai ni loin a chinchang hre tur china ngaihte pawh an fimkhur seng lo niin a lang a; Covid-19 vei hmuh chhuah thar pawh hi ZMC lama hnathawktu ni chungin a sample test result chhuah hmain a lo inkhel a, a positive ta si a, mi tam takin an buai phah ta a ni ber mai.
Sorkar hian dan a siam a, hmai tuam tur, vantlanga awm khawm loh tur, inkhel an awm pawhin mi 24 aia tam lo tur tihte leh zan lama pawn chhuah phal loh hunte nen a bithliah a. Hengte hi mipui nawlpuiin zawm ṭha tawkhat mah se, a zawm lo pawl an awm leh ṭhin. Tun hnaia Covid-19 vei ta pawh hi an chhui zelnaah hian an inkhelh zawha inkhelte hi sorkarin zana chhuah a phal loh hnuah pawh an inkhel zel niin a lang a, zan dar 7:00-a inkhel zo chiahte pawh hi an awmna veng azirin dar 7:30 hmaa mahni in thleng tur chuan a harsa mai thei a; sorkarin chhuah a phal loh hnua pawn chhuak satliah pawh ni loa inkhelte an awm a nih chuan, khawtlang hruaitu lam leh police lam pawhin an ngaihven zui zel a ṭha ang.
Hri hlauhawm laka kan fihlim beiseiin a ram pumin kan inkharkhp a, mi tam tak eizawnnain a tawrh phah rak thlenga kan inkharkhip tawh hnuah hian kan hri hlauh ber mai hi tute emaw fimkhur tawk loh leh inthlahdah avangin a darh palh ang tih a hlauhawm.Veng leh khaw ṭhenkhata kan khauha kan fimkhur viau laia hmun ṭhenkhat inthlahdah bik an awm chuan kan zavaiin kan tuar thei tih hre thar ila, kan ṭan rual a ngai takzet a ni.
Sorkar pawhin kan ram dinhmun thlir chungin pawn chhuaha tei suau suau a him leh him loh te, zan lama chhuah loh hun a siam khauh taka kenkawh chungchang te, inkhel thei tura inthlah zalen hunte pawh hi ngun lehzualin ngaihtuah nawn se. India ram hmun danga an inhawn zau avanga inhawn zau ve vak hi kan tlin lohna chinte pawh a la awm thei. Engpawhnise he hri hian min luhchilh tawh avangin kan invena kan fimkhur thiam a ngai a, he hripui dona kawngah hian inthlahdah bik awm loa kan zavaia ṭan rual a ngai takzet a ni.