Sorkar sum bawm leh a hnathawkte hlawh

Mizoram sorkar chuan a hnathawkte July thla hlawh a pûk leh dawn a, chumi hnua a pûk chhunzawm zel dawn leh dawn loh chu sum dinhmun azirin ngaihtuah ṭhat leh a ni dawn niin Finance department hotute chuan an sawi. 

Covid-19 hri leng donaa sum senso a tam tham avangin Council of Ministers thutlukna angin Mizoram sorkar chuan sum dinhmun a ṭhat loh avangin sorkar hnathawkte June thla hlawh a pûksak tawh a, July thla hlawh pawh a pûksak leh dawn ta a; heng pawisate hi thil dangah hman a ni lo a, hman tur pawh a awm chiah lo. Sorkar hnathawkte hlawh pek kim tur hi sorkarin a neih loh avangin a ba ṭhen a ni zawk mahin a lang.

Tuna kan sorkar sum dinhmun chu a ṭha lo hle a, a hnathawkte hlawh tur pawh a pe thei lo a, sum a neih loh avangin a mi rawihte hlawh a bat ṭhensak a, sum a neih hunah a pe kim leh mai dawn niin a lang a. Hetihlai hian sorkar hian thil dangah chuan sum a nei loin a lang lem lo a, a duhzawng hna a thawk tho a, contractor pawh ni lem lo ruling party worker-te hnena contract hna pek a kalpui reng a, minister ṭhenkhat phei chuan sorkar thil tih tur hraw pui puai an la sawi dup dup reng tho a ni. 

Tun hnaiah sorkar lam offi­cial-a insawifiahna ni lem lo, ruling party ṭhalai lamin sorkar sum pawh pên theih chi leh pawh pên remchang lote an sawifiah tawh a; nimahsela tuna thil lang tlang vek pakhat chu SEDP atana sum ṭhahnem tak dah khawih chet loh a la ni zel a, heng pawisate hi khawih thiang lo a nihna awmin a lang lem lo. Hei bakah hian sorkar hnathawk zawkten hlawh a kima an lak theih lohlai hian, SEDP Board hrang hranga hna­thawktute hian an hlawh hi a kimin an hmu nge hmu lo tihte pawh chhui chian chakawm tak a ni awm e. 

Engpawhnise kan sorkarin a hnathawkte hlawh pek tur a nei daih tawh lo a, a ba ṭhen ta hial a. Hetiang dinhmuna kan tluk luh hnu hi chuan sorkar hian loh theih loh thilah lo chuan a sum hman hi insum ve se, pûk chawpa kal chunga pawisa hman huau huau hi a inhmeh lo.