AMC Property Tax

Mizoram Pradesh Congress Committee (MPCC) chuan, Aizawl Municipal Corporation (AMC) enkawltu MNF sorkar chu property tax hmanga mipui rawkah an puh a, "Property tax punna rate sang lutuk avangin chhungkaw tam tak an buai hle. Nikum 2021-22 a tax an pek zat aṭanga 60%-80% vela pung chhungkaw tam tak an awm," an ti.

Property Tax hi a ngai reng tur a ni lo a, miin 'property' an neih belh chuan a pung tur a ni a, chumi piah lamah kalphung pang­ngaiah pawh zawi zawiin a pung chho tur a ni ang.

Chutihlaiin vawi leh khata a pung thut a nih chuan a fel tawk lo a, thuneitu lam pawhin a chhan hi an sawifiah vat a ṭha hle ang.

Zep thu a cheng lo a, Mizote hi thil chîk taima tak kan ni lem lo a, thil thlen chhan hi kan chhût tawk lo fo a, chutihlaiin sorkarin ti tura min tih chu a chhan pawh zawt lem loa thuawih taka ti mai ṭhin kan ni. Tun hmaa chhiah awm ngai lo an lâk thar pawhin sorkarin a tih chuan kan pe dial dial mai. Tunlaia sawi hlawh tak Property Tax pawh hi a punna nen hian chhungkaw tam zawk chuan an pe fel tawh ngei ang.

AMC lam hian property chhut dan dik zawk nia an ngaihin an chhut thar a, hei hi a pun chhan nia an sawi lian tak a ni a, chhan dangte pawh a awm thei ang. Engpawhnise chhiah hi chu thil pung ṭhin a ni a, vawi leh khata säng taka a pung a nih chuan AMC lam hian mipui hnenah a chhan dik tak an puan a ṭha ang.

Sorkar sum indaih loh chhawk­na tur ang leka chhiah tihpun te pawh a awm thei a, mi hriat lohna remchanga laa mipui aṭanga sum laksak pawh a awm palh thei. Hetiang thil ni loa Property Tax sang zawka lak a nih tak chhan hi mipui nawlpui hriatthiam theiha puanzar a ṭha khawp mai.