Kawng chhia leh sorkar

Tunlai hian Khàmráng leh Kolasib inkar National Highway-54 kawngpui chu hmun eng emaw zatah a chhia a, lirthei tam tak an tàn ṭhin bakah, lirthei ṭhenkhat chu kawngpuiah an tlu hial a ni. Khamrang lamah phei chuan lirthei an tlân ṭha ngam tawh lo. NH-54 kawngpui hi National Highways and Infrastructure Development Corporation (NHIDCL) kutah  a awm tawh a, siam ṭhat hna thawh ṭan mêk a ni. 

Kan rama kawng­pui kan neih zinga a pawimawh ber ang hiala chhal ngam chu Assam aṭanga Mizoram kan luhna kawngpui liam ber hi a ni a. He kawngpui hi tunah chuan Kawnpui aṭangin Khamrang lamah kawng thar sial a ni tawhin motor lian rit phurte tlanna kawmg ber a ni a, chutihlaiin he kawngpui hi a ṭha rei hman lo a ni ta ber mai. 

Kawngpui hmun pawimawh lai ṭhenkhat hi Mizoram sorkarin enkawl loin tunah chuan NHIDCL kutah a awm tawh a. Tun hnaia kawngpui chhe zual laite hi NHIDCL kuta awm niin an sawi a, chutihlaiin Mizoram PWD enkawl chin pawh hi tlan harsa khawpa chhia a awm ve bawk.

Tuna mipui nawlpuiin an hriatthiam awm chhun chu kawngpui enkawltu lam ni loin kawngpui dinhmun hi a ni a, kan kawngpui pawimawh a chhe em em mai hi an ngaimawh a ni. Kawngpui ngai pawimawh anga insawi leh sorkar hmasa hunlaia kawngpui chhia nâ taka demtuten sorkarah vawnfung an chelh mêk a. Anni hnuaiah meuh pawh kan kawngpui pawimawh bera lirthei an tlu ta fo mai hi chu a lungchhiatthlak hle a ni. 

Lirthei neitu, sorkara road tax tam tak tak chhung lut ṭhinte tán chuan an eizawnna lirtheite a hranpaa va che sual pawh ni loa kawngpui chhiat avanga a let ngût reng hmuh hi chu a thinurthlak hle ang tih a rin theih. A hun takah lirtheiin bungrua an phurh thlen mai loh avangin mi tam tak eizawnnain a tuar phah thei bawk a ni. 

Engpawhnise kan kawngpui chhe reng mai hi sorkar ni lo tan chuan buaipui ngaihna pawh a awm lo a, Mizoram sorkar kutah a awm emaw NHIDCL kuta awm pawh awm se, Mizo mipuite hian kawngpui ṭha an mamawh avangin Mizoram sorkar hian ṭan la deuh teh se.