Hnathawka inhlawhna remchang leh sorkar
Mizoram sorkar chuan Covid-19 avanga hmasawnna hnathawh hun eng emaw chen a chawlhsan hnuah tun hnaiah hna a thawk chho ṭan leh mek a, an hnathawh kalpui mek leh thawh tura ruahmannate hi thil sak (construction) lam hawi a tam hle.
Mizoramah hian 'hmasawnna' tia kan sawi hian a taka lang chhuak thei thil hi kan sawi deuh ṭhin a, chutiangah chuan hmasawnna ruhrel (infrastructure) din hi kan sawi zin pawl tak a ni. Congress-in sorkarna vawn fung an chelh kum 10 chhung khan hmasawnna ruhrel hi ṭhahnem tak an buatsaih hman a, hmachhawp an neih leh hmalakna bul an ṭan tawh tuna sorkar tharin a chhunzawm zel pawh eng emawzat a awm. MNF kaihhruai sorkar thar a piang a, hmasawnna an hriatthiam dan hi a taka lang chhuak chi a saka sak lam an buaipui chho leh nasa hle.
He ram hian infrastructure ṭha hi a mamawh lo a ni lo a; nimahsela kan thil atchilh leh kan intehna hi a taka thil sak (construction) lam zel a nih chuan mipui tam ber kuthnathawktu lam hian hmasawn an la hlat dawn hle tih a lang. Tun hnaiah hetiang infrastructure lam thil kalpui a nih reng rengin ruling party mite hamṭhatna emaw, a changtu minister-in eng tin emawa (in-direct) hlawkna a tel turin kalpui a ni deuh zel.
Kan ram dinhmun hi thlir ila, building siam belh zel lam zawnga hmasawntir aia tih tur pawimawh zawk hi ṭhahnem tak a awm a, a saka saka contract inpekna remchang ang zawng zela hmasawnna hi kan teh a nih chuan state hmasawn kan ni ngai lo ang tih a hlauhawm hle. Sorkar hi Covid-19 avangin rei tak chu a han ip ve deuh a, tun hnaiah a nihna rawn lang chhuakin a hmachhawp hrang hrang a puante pawh tute emaw tana contract leh a tuihang hawp theihna remchang lam hawi a ni deuh zel.
Heng thilte hi ramin a mamawh a ni lo a; nimahsela mipui nawlpui tana hamṭhatna ni phak si lo, khawi laiah emaw langsar taka thil hnutchhiah a, 'Hei hi kan sorkar laia kan sak' tih theih tur lamah kan kal na ta lutuk a. Party worker leh minister-te lamhnai tana hnathawka inhlawhna remchang hi kan zawng ta lutuk deuh niin a lang a, a pawi hle.
Heng thilte hi kan kalpui a nih pawhin mipui nawlpui tana hmasawnna tur lam hi kalpui tam ni se mipui tan a ngaihthlak a nuam deuh tur a ni a, tunah erawh chuan mipui nawlpui thleng phak hmalakna sawi tur a la awm meuh lo.