Assam Rifles leh mipui

Champhaia sumdawng leh lirthei neitu pawl hrang hrang tun hnaia ṭhukhawm chuan resolu­tion siamin, Assam Rifles-te'n khawchhak tlang­dunga chêngte tan harsatna an thlen thu an tarlang a, an chêt dan an dem. 

Champhai District-a pawl hrang hrangte thuchhuah en hian Assam Rifles-te hian mipui tán harsatna nasa tâk an siamsak ngei niin a lang a, an chet dan ṭhenkhat ruang phurhna lirthei thlenga an endik leh hmeichhia pawh tharum hmanga an hmachhawn tihte hi thil tak tak a nih ngai chuan a zialo takzet a ni. 

Hetihlai hian Assam Rifles lam hi chuan insawi thiamna tur chu an nei ve ngeiin a rinawm a, ram venhimna kawnga an tih tur tiah an inngai ve ngei ang. Zep thu a cheng lo a, Myanmar hnaih lamah hian ruihhlo, silai, pawisa lem leh rangkachakte thlengin sorkar phal loh tawlh ruk hi a hluar em em a, hei vang hian Champhai District hmun ṭhenkhata sipai lamin uluk taka thil an endik hi chu a mak vak loh dan pawh a awm thei ang. 

Engpawhnise Assam Rifles-te hian awm chhan lian tak an neih chu ram leh mipuite venhim hnathawh a ni a, mipuite tana harsatna thlen zawnga an khawsa a nih chuan thil fel lo tak a ni. Thil tisual pawh ni lo, dan ang taka lirthei veivakte tana harsatna siam a, mipui nawlpui tana ngaimawh tur khawpa an awm a nih chuan an tidik lo hle a ni ang. 

Sorkar hotu lam an inrawlh a ṭul tihna a ni a, mipuiin harsatna an tawk a nih chuan a bialtu MLA pawhin Assam Rifles lam hi kawmin thil awm dante sawipui ve se, a la fel thei lo a nih chuan Home minister-ah kalin a la ṭul cheu a nih chuan chief minister pawh pun mai tur a ni ang. Champhai mipuite'n Assam Rifles laka harsatna an tawh chungchangah sorkar hotu lamin bân a phar a ngai e.