Covid-19, sorkar sum leh MLA fund

Mizorama eptu party MLA ṭhenkhat chuan sorkarin Covid-19 dona sum an kalpui dana lungawi loin an MLA fund aṭangin Chief Minister Relief Fund-ah pawisa chhun luh chhunzawm an tum tawh loh thu an sawi. 

Khawvelin hripui avangin harsatna a tawk a, Mizoram pawhin he hri avang hian kawng tinrengin harsatna a tawk. Hetihlai hian thil lawmawm tak lo lang chhuak chu Mizo mipuite inlungrualna a ni. Hripui karah pawl pawl sawi loin sorkar kan thlawp a, kohhran hrang hrang awm loin inthurualin TV kal tlangin kan inkhawm a, khaw tin veng tinah mipui ṭang rualin Task Force hming invuahin mahni veng leh khúa ṭheuh kan veng a. Hlawh beisei miah loin thlà tam tak ramri vengin mi tlawmngaite an riak chhuak bawk a ni. 

Kohhran hrang hrangin a thlawnin an hmunhmate tang­khang lo hawte khung hranna atan an thawh a, kohhran ṭhenkhat phei chuan an hmunhma hmang hawhtute hi a thlawnin an chawm hial a ni. 

Hetia mipui kan inlungrual viau lai hian mipuiin an hriat duh kan state sum dinhmun chu hriat theihin a awm ngai lo a, a enkawltu Finance minister berin a hriat loh thu a sawi miau si avangin mipui pawh an hawihai hman hle. Hun a kal deuh a, pawisa awm loh thu puan a nih hnuah kan sorkar hotu liante ṭhukhawm chuan sorkar hnathawkte hlawh chu pûk ṭhen an rawt ta hial a, he state hian sumah harsatna lian tak a tawk ni ngeiin a lang. 

Suma harsa viaua a lanlai hian sorkar pisate hawn a nih hnuah nunphung a pangngai chho leh ṭan tihah minister ṭhenkhatin sum tamzia an sawi an sawi leh ṭan tawh a, a tak hmuh tur awm lo lungphum phum leh an hnathawh tur hrawl pui pui puangin an zin kual a; hetihlai  vek hian sorkar chuan khung hrante chu mahin ei leh senso intum tura a tih mai piah lamah an swab sample endikna man pawh châwi tawh turin thutlukna a siam. 

Chief Minister Relief Fund lamah sum ṭhahnem tak a la awm tih mipuiin an hria a, SEDP lama sum dah ṭhahnem tak an la khawl reng tih eptu lamin an sawi chhuak bawk. Hetiang boruakah hian eptu MLA-te hian an bial tihhmasawnna tur sum chu CM Relief Fund-a chhun luh ṭul an tih loh thu an sawi chhuak ta a, mipui ngaihdan eng tak ni ang maw?