Hunpui atana inbuatsaih

Mizote tana hunpui ber pakhat Krismas leh kumthar a lo hnai leh ta a, heng hunpui atan hian sorkarin ruahmanna hrang hrang a nei ṭhin.

Aizawl khawpuiah hian December-ah traffic jam a nasa zual ṭhin a, Covid-19 hripui avanga kum hnih chhung duh anga hunpui hman a nih tawh loh avangin kan hmaa hunpui lo awm turah hian mipui an chhuak nasain traffic jam pawh a nasa sawt mai thei. Hengte hi tun aṭanga fing taka ruahman lawk a nih loh chuan a hun a lo thlenah mipuiin harsatna lian zawk an thawh palh a hlauhawm hle a ni.

Halpuah khap chung­changah sorkar a che hma hle a, state pawn aṭanga an lakluh hmain khapna thu chhuah hman a ni a, thil lawmawm tak a ni. Hetiang bawk hian hunpui lo thleng tur atan inbuatsaihna hi nei hma thei ila a ṭha hle ang.

Khawtlang thuneitu lam pawhin khap leh phal loh an neih dâwn pawhin chhan ṭha tak neiin kalpui thiam se, hunpuiah ṭhalaiten hun thawl, him leh thianghlim zawk an neih theihna turin sorkar leh khawtlang hruaituten ruahmanna fing tak an neih a ṭul.