Inthlan campaign an ṭan a ni zawk em?

Mizoram hmun hrang hrangah Village Council inthlan a hnai chho mek a. Aizawl khawpuiah pawh Local Council inthlan a awm dawn bakah Aizawl Municipal Corporation inthlan pawh a hun a hnai chho zel a, Covid-19 avanga harsatna lian tham a thleng zui a nih loh chuan heng inthlante hi tun aṭanga hun rei vak loah buatsaih a ni ang.

Mizoramin in lungrual taka hripui kan do kha hun a kal hret hret a, a ri a lo dang chho ṭan a, Chief Minister Relief Fund-a sum thawh duh leh duh lo an awm hrang a, sorkar lam lahin hri vei leh vei lo endikna RT-PCR khawl chu eptu lam pek ṭul a ti vak lo a, an pek pawhin a tirah an dawng ṭha duh vak lo. Hetihlai hian midang khawl hawh chawpin rei tak chhung hri kan endik a, tun hnaiah mimal thilpek sorkarin a dawng hlauh a, sorkarin lei a tum USA-a an chah kha a thlen leh thlen loh vantlang hriatah puanzar a la ni lo.

 

Hetiang boruakah hian sorkar lamin a hnathawkte hlawh a bat ṭhensak a, a pe kim thei lo a, a chhan chu pawisa a nei lo nia a insawi vang a ni. Pawisa nei loa insawi sorkar hian hmun dangah chuan hnathawh a chawl chuang lo a, a minister-te ngei ngei pawhin tun hnaiah chhuang takin hripui karah hmasawnna an kalpui zel thute an sawi chhuak ang lawi a, thil inkawkalh tak tak hi kan ramah a thleng mek.

Heng thilte hi mipuiin mak tia kan thlir laiin kan hma lawka inthlan hrang hrang awm tur hre reng hian sorkar hian ṭan a la zawk pawh a ni thei a; hri leng avanga kan buai lai hian hna an thawk duh a nih pawhin ngawi renga thawh mai an duh lo a, an thawh ṭan hma hauha lungphum phum aṭangin uar thei ang berin an puangzar a, hengte hi kan hmaa inthlan lo awm tur thlir chunga sorkar chakna hmanga party invawrh tumna a nih chuan a vanduaithlak hle a ni. 

Mipui nawlpui lakah sorkarin kut a dawh a, naupang leh tar thlengin an pawisa neih ang ang CM Relief Fund-a an chhun khawmlai hian construction lam rawngkai hna hmanhmawhthlak ni lo tam tak thawh mekte leh, a hnathawkte hlawh pawh pe thei lo chunga a inham puar zawnga sorkar a kal ṭan ta tlat mai hi kan hma lawka Village Council, Local Council leh Aizawl Municipal Corporation inthlan lo awm tur atana boruak siam an tumna a lo ni reng lo maw?