Property tax chungchang kal zel

Aizawl Municipal Corpo­ration (AMC) hotute chuan property tax tihsan chungchang an sawifiah a, Mizoram Pradesh Congress Committee (MPCC) chu thu dik lo thehdarhah an puh.

Aizawl Mayor chuan, sorkar lai­puiin municipal-te chu property tax an lak tipung tura a tih thu sawiin, "Kan tipung lo a nih chuan kan sum dawn tur min pek loh an tum a ni. Chuvangin, AMC pawhin property tax chhûtna 3% of annual property value (APV) ni ṭhin chu 0.42%-a tipungin 3.42% APV a lo ni ta a ni," a ti a; a punna rate chu a hniam thei ang ber a nih thu a sawi.

Tun hnaiah dan thar hmang­in Mizoramah lirthei kaih­hnawiha dan bawhchhiate hremna na zawk an kalpui ṭan a, September 1, 2022 aṭang khan Motor Vehicle (Amendment) Act 2019 chu Mizoram pumah kalpui a ni. He dan ang hian lirthei kaihhnawiha dan bawhchhiatna avanga hremna chu a na sawt hle, sum chawi tur pawh a let tam taka a punnate a awm. Mizoram sorkar lam sawifiah dan chuan he dan hi hmang ngei turin sorkar laipui aṭangin nâ taka nawrna an dawng reng a, kalpui lo thei lo dinhmunah an ding ta a ni.

Aizawl Mayor sawi ang hi a nih chuan chhiah tih­pun thar pawh hi sorkar laipui lam nawrna vang bawk a ni leh a, AMC hruaituten an duh reng vanga an tihpun pawh niin a lang lo.

A tipungtu leh tipung tura nawrtu chu tu pawh lo ni se, a tawpa tuartu chu mipui an ni. Tun hnaia MV Act 2019 hman thar leh Proper Tax sang zawka lâk hian mipui phurrit a belhchhah lo thei lo. Electric chhit man a pun bakah tui bill tihpun tumna a lo awm ve zel nen, a tawpa a pawisa pe chhuaktu chu mipui lam zel an ni a, mipui tán phurrit a ni chho zel ang tih a hlauhawm hle.