Ei leh in hrisel leh thianghlim

Ei leh in tur enfiahna, mobile food testing laboratory thar chu tun hnai khan Health & Family Welfare minister-in a tlangzarh a, nitina ei leh in mamawh zualpuite endik thei tura thuam a ni. 

Mizote hian tun hma deuh kha chuan ei leh in hrisel leh thianghlim lam hi kan buaipui phak meuh lo a, a ei leh in tur kan neih kha chuan kan lungawi tawk viau ṭhin a ni. Zawi zawiin hma kan sawn ve zel a, tunah chuan ei luat tuar loh vanga hrisel lote kan awm chho ve ta nawk mai a, ei leh in hrisel ngaih pawimawh a ṭulna lam pawh kan sawi uar ve ta hle. 

Tlemlai kha chuan a neinung deuh kha chu an ei nasa a ni deuh mai a, an pianzia aṭang rengin mi hausa kha hriat theih khawpin an thau mung ṭhin kha a ni a, tunah erawh zawi zawiin hriselna lam kan uar chho ta a, hmasawnna duhawm tak a ni. 

Hetihlai hian kan ei tur thianghlim leh thianghlim loh, a hrisel leh hrisel loh lam endikna kawngah hi chuan kan la pachhe viau mai. Tunah hian hetiang endikna laboratory ṭhate hi kan state hian kan mamawh em em a, chumi kawngah chuan sorkar pawhin ṭan la thar zel se a duhawm khawp mai. 

Khawlaia kawng­pui kama sa sêr mai ṭhin hnam kan la ni reng a, slaughter house man to tak taka siamte hmang ṭangkai loa a remchang apianga sâ talh ṭhin kan la ni a, kan ei leh in tur hi Myanmar lam aṭangin khaw chhak lam chhuak endikna paltlang lo a lo lut reng a, kan chawhmeh bazar-te pawh kawngpui khu tak bulah a ni deuh vek mai. 

Hengte avang pawh hian ei leh in tur endikna ṭha kan mamawh a, chumi rual chuan ei leh in tur hriselna leh thianghlimna kawngah pawh hnathawh hmabak thui tak kan la nei tih kan hriat a ṭha khawp mai.