Kan ramri hauh chin leh kan luah theih chin inmil lo hi

Tun hnai khan Mizoram leh Assam sorkar aiawhte chu ramti chungchangah an inbia a, inbiak zawhah Mizoram Home Minister chuan ramria Mizoram sorkar dinna chu Bengal Eastern Frontier Regulation (BEFR) 1875 a nih thu a sawi nawn.

State panihte inep mai loa ṭha taka dawhkan khat kila ramri chungchanga inremna an zawng hi a lawmawm a, Mizoram sorkar aiawhte'n kan dinna huaisen taka an sawi pawh hi thil lawmawm tak a ni. Hetihlai hian kan ramri tia kan hauh chin leh a taka kan luah ram inmil ta lo lutuk erawh a pawi a, tuna kan luah ram piah lamah kan ram chhung kan tih tho si-ah kan lut thei lote hi a zialo hle a ni.

He inbiakna hi mipuiin an ngaihvenin ramri chinfel hlan an nghakhlel a; nimahsela ramri hi vawi leh khata chinfel theih chi a ni lo a, hun rei deuh a duh ṭhin avangin hmasawnna a awm hrim hrim hi thil lawmawm a ni.

Tuna kan duh ber chu BEFR 1875 kan pawm thu Assam hnena hrilh nawn lam hi ni tawh loin a taka luah theih a ni. Tunah hi chuan kan ram tia kan chhal chhungah Assam lamin hmun zau tak an nei a, BEFR 1875 chhung hmun zau tak hi Assam sorkarin a enkawl mek a ni.

Kan ram tia kan hauh chin leh kan luah chin hi a inmil lo a, kan hotute hian kan ram hauh chin hi a taka kan luah ngei theihna turin ṭan la zel se a lawmawm ang.