Zirtirtu lak buaina hi

Samlukhai Middle School chuan Inrinni kal ta khan an sikul kum 50-na, golden jubilee an lawm a. Khuallian, Human Resource Development board vice chairman L Thangmawia, MLA chuan, kum 2019 hnuah sikula zirtirtu a ngheta thawk tur mi 152 leh a nghet loa thawk tur mi 880 lak a nih tawh thu a sawi a, hripui léng karah Mizoram sorkarin zirnaah nasa takin ṭan a la nia sawiin, "School Education minister Pu Lalchhandama Ralte kaihhruaina hnuaiah zirna siamṭha turin theihtawp chhuah a ni a, December 2018 thlaa sorkar thar a pian hnu khan zirtirtu 958 an châwl tawh a, chutih rualin, MPSC kaltlangin zirtirtu nghet 152 lak tawh niin, MR zirtirtu 880 lak a ni tawh bawk," tih a sawi.

Zirtirtu lak hi kan mamawh a nih phawt chuan tih ngei ngei tur a ni a, mahse induhsak nana zirtirtu lak awm ṭhin erawh a pawi hle. MPCC media departmet phei chuan School Education Minister Lalchhandama Ralte-in a mi duhsak zawngte a thun ti hialin zirtirtu lak chungchang hi an lo sawi tawh a. Zirtirtu lak tura dilnaah Assembly Speaker-in ‘kan iptepui banna an ni a...’ tia a dilpuite an awm a; School Education minister-in, ‘special case’ a tih te, ‘Ani hi ka duhsak tak a ni a,’ a tihte leh, “Ani hi special-a kan ngaih pawimawh a ni,” tih inziak te pawh a awm tih sawi a lo ni tawh ṭhin.

Zirtirtu laka thil fel lo awm nia sawi te hi kan Chief Minister pawhin chinfel a lo tiam tawh ṭhin a, mahse vawiin thlenga Education deparment-a kan buaina zirtirtu lak leh aikal lak teah hian hmasawnna hmuh tur a awm lo a. MR-a zirtirtu lak turah phei chuan a dil thei chin an tihchhuah aṭangin inhnialna a awm a, Assembly House-ah pawh sawi a lo hlawh tawh a ni.

Ram hmasawnna atana pawimawh ber pakhat chu zirtirtute an ni. Chutih laiin zirtirtu lak dan aṭangin thil fel lo a awm nghal ṭhin hi a pawi a. Zirtirtu dik taka lak a nih ṭhin theih nan Education Department leh Chief Minister hian vil pui ngam ṭhin se a duhawm hle.