Zu khapna hnuaiah zu

Excise & Narcotics depart­ment (END) leh Mizoram Police chuan October, 2022 chhung khan rakzu litre 6,510.95 leh zu zuar mi 380 an man a; kumin October thla chhung khan rakzu litre 6,510.95 leh zu zuar mi 380 an man a, zu bilh lai ṭín 11,520, zu siamna dawidim kg. 4, zu siamna bungbél 56 leh zu rûi mi 86 an man a ni. Sapzu ûm puitling (ml. 750) 2,536, a chanve ûm (ml. 375) 29 leh pava khat (ml. 180) ûm sarih an man bawk.

Kan ramah zu khap burna dan hman mek a ni a, chuti chunga heti zat zu leh a kaih­hnawih thil man tur a awm reng hi a vanduaithlak hle a ni. Hei hian chiang taka a lantir chu Mizoramah hian dan loa zu zuar tam tak an awm a, zu in tur hi a awm reng bawk tih a ni.

Zu mai bakah hian ruihhlo a hluar a, tun hnaiah a hlawm lianin ruihhlo man thawm hriat tur a awm deuh reng. Ṭhalai zingah ruihhlo ti thar an tam a, ruihhlo hlauhawm ber pawl Heroin man a tlawm zual tâk avang hian ruihhlo ngai pawh an pung hle niin an sawi.

Kan ram din­hmun dik tak hi chhut chian chuan a ṭha lo tih thup rual a ni lo a, zu leh ruihhlo zalenna ram nih loh hram dan kan sorkar hian a zawn a ngai. Dan hmangin zu zawrh khap a ni a, dan loa zu zuar an lian thur thur a, chumi piahah ruihhlo hlauhawm a hluar em avangin sorkar pawhin a NGO zawk a pun ta ruai a ni ber.

Engpawhnise sorkar hian zu hi a khap a nih chuan tun ang mai mai lo deuha a kal a ngai ta. Zu khapna hnuaia 'zu hmun' tih mai tur khawp a la awm rengte hi a zialo a, tihtawp dan ngaih­tuah a, a thu mai ni loa a taka vil zui pawh a ṭul a ni.