ITM 2022 hlawhtlinna tak tak

Mizoramin a vawi khatna atana a thlen, International Tourism Mart, tun November 16-19, 2022 chhunga neih chu a hlawhtling hle tih Tourism department hotute'n an sawi a; an rin phâk baka a hlawhtlin thu te, ITM puala Lammuala State Mega Exhibition phei chu ni tin mi 20,000 chuangin an tlawh anga an chhût thute an sawi a ni.

Sorkarlaipuia Ministry of Tourism leh Mizoram Tourism department-te'n an buatsaih ITM 2022 hlawht;ing taka Mizoramin a thleng hi a lawmawm hle mai a; Mizoram leh Mizo mipui tan tourism industry lama hmasawn zelna turin rah ṭha a chhuah ngei pawh han beisei phawt mai ila.

ITM 2022 hlawhtlinna tak tak chu, kha ni li chhunga thil thleng ringawtah khan a zo tur a ni lo a, hma lam hun lo la kal zel turah Mizorama tourism industry bakah, khualzin lam kaihhnawih buaipuitu tour operator-te'n hmasawnna leh hlâwkna an chan chhoh zel hi a hlawhtlinna tak tak tehna tur chu a ni zawk ang.

Chutih laiin, ram dang aṭanga tour operator emaw, tourism industry emaw lam buaipuitute an rawn tel ta lo erawh chu kum hmasa lama an tel dante ngaihtuahin, a khingbâi deuh niin a lang a. Ram dang aṭangin mi eng emaw zat rawn tel ngei se, Mizoram tourism industry tan a ṭhat lehzual dawn tehlul nen; mahse, India rama mite chauh pawh hlâwkpui tham a ni thoin a rinawm.

Tourism department hotute sawi danin, ITM 2022 atan khan Ministry of Tourism-in cheng nuai 430 vel leh Mizoram sorkarin cheng nuai 200 vel an hmang a, a vaiin nuai 630 vel a ni. Heti zat sum senna ITM 2022 kha ni li chhung lekah khan a liam mai loh nan leh Mizoram tourism industry-in hlâwkna sáng zawk a chan zui ngei theih nan Mizoram sorkar, Tourism department leh Mizorama tourism industry buaipuitute'n ṭan an lâk sauh sauh zui zel a ngai ngei ang.