Mau/ rua-ah CM a mal ṭan em ni?

Tun hnai khan Ashwini Kumar Choubey, Minister of State for Consumer Affairs, Food and Public Distribution and Environment, Forest and Climate Change chu Mizoramah lo kalin Chief Minister nen an inkawm a, Chief Minister chuan Mizoram economy hmasawnna atan mau a ṭhat thu a sawi a, mau hmanga ṭan an laknaa kawngpui ṭha mamawh a nih thute a lo hrilh bawk.

Kan Chief Minister hian hun rei tak ata tawh mau/ rua hmanga Mizoram sum leh pai dinhmun siam ṭhat a tum thu a sawi tawh a, mi pawimawh lo zinte pawh a sawipui ṭhin. A rilru a nghetin a tumah a chiang em em a, a hlawhtlin hlan a nghahhlelhawm takzet a ni.

Hetihlai hian a cabinet-te hian mau/raw chungchangah hian kan Chief Minister hi an thlawp ṭha tawk lo niin a lang a, kan state flagship programme ve meuh si hi an lam ri khat hlawm hle. Chief Minister berin mau/rua hmanga kan ram siam a tumlai hian midangte hian an sawi ve mang hauh lo mai a, tun ai hian mau/rua chungchangah hian kan ram hruaitute hi ṭang rual deuh se a ṭha khawp mai.

Kan ram sum bawm en­kawl­tu leh kan ram hotupa ber chuan mau/ rua hmanga economy siam ṭhat a tum a, midangin tum dang an lo neih ve hi a ṭha ber lo a, a hlawhtlin ngeina tura ṭangruala beih a ngai ang.

Kum li an sorkar hnuah a taka sum lakluh a la awm lo a, a kawngpui lamte kan la chai mek a, kawngpui sial a nih hnu leh mau/rua a puitlin hnuah kan ramah hian sum leh pai tam zawk a lo lut dawn tih hi sorkarna chelhtu MNF lam hian phûr takin sawi tlang se, mau leh ruaah hian kan CM hi an mal ṭantir lutuk deuh lo maw?