Ualau taka Smuggling kal reng hi

Tun hnaiah Vairengtea kuhva chhekna kudam pakhatah poppy seed ip 100 leh Myanmar aṭanga lakluh teak cubic 200 man a ni.

Vairengte khaw daiah hian kuhva chhekna kudam a tam hle mai a, heng kudam-te hi thawkkhatlai khan dan bawhchhiaa sak tiin Bawrhsap thupek anga kalh a lo ni tawh a, nimahsela a hnu lawkah hawn a ni zui leh a, kuhna smuggling pawh ualau taka kalpui a ni reng ṭhin.

Tun hnaiah nawrna nasa tak a awm leh avangin sorkar chuan kuhva smuggling tihtawp a tum thu a chhuah a. Serchhip daiah leh Aizawl khaw daiah check gate a siam teh daih a; Vairengte lamah chuan kawngpui kam maiah kuhva chhekna an la siam lawi si a ni!

Hachhek bial lamah anmahni kuhva thar chhuah ngei pawh an hralh hleihtheih loh avangin mipuiin lungawilohna an lantir a, chutihlai mek chuan tun hnaiah kuhva ip bulah poppy seed hlawm liana man a awm ta zauh zauh mai a, ngaihtuah a tithui hle.

Kuhva tawlh ruk sum­dawnna hlawkzia an sawi rual hian mi tam tak chuan rinhlelh an nei tel ṭhin a, finfiahna engmah a awm loh avangin langsar taka inpuh ngawt theih a ni lo a; amah­erawhchu kuhva ip kiang lawka poppy seed an man hian ngaih a tiṭha lo hle a ni.

Sorkar tan kuhva leh thil danga dan loa sumdawnna tihtawp hi thil harsa niin lang lo mah se, tun thlenga a la kal reng mai hi a mak zozai ta ngawt mai.