Smuggler puitu an awm ṭhin em?

Tun hnaiah Vairengte daia kuhva chhêkna kudam-ah ruihhlo siamna nia hriat poppy seed tam tham tak man a ni a, he kudam-ah vek hian kuhva rah hmuh a ni a, dan loa teak thing lakluh hmuh a ni bawk. Tun hnaiah vêk Hachhek bial lamah kuhva rah phurtu lirthei an manah poppy seed an lo phur tel tawh bawk a ni.

Kan rama thil thleng hi thil seriour tak ni si hi 'ngaia neih' ang maiin kan thlir liam ang tih a hlauhawm ta takzet mai a, heng smuggling lian tham tak kal mup mup reng mai hi kan sorkar hian mit a siai zel dâwn nge a takin a che ngam dâwn, tih hi mipui zawhna a ni.

Zep thu a cheng lo a, Myanmar aṭanga bungraw hrang hrang lo lut ṭhin hi dan dik tak ni loa lo lut deuh vek a ni a, smuggling tia chhiar tel theih vek a ni. Hetihlai hian mipui tana pawi khawih lian zual ruihhlo leh ralthuam tawlhtute chuan dem leh huat pawh an hlawh a, hun rei tak chhung kha chu kuhva kha tawlh ru pawh ni loin langsar taka tawlh a ni a, mi tam takin an hauhsak phah a ni.

Kuhva rah lakluh leh tawlh ngawr ngawr kha a tirah pawiin lang lo mah se, tunah chuan kan rama kuthnathawktute tharchhuah kuhva hralhnain nasa takin a tuar a, chu bakah black market-a sumdawnna a nih miau avangin hausa thut an pungin khawtlangah nghawng ṭha lo tak a nei.

Hetiang thil ni si hi kan sorkar hotute hian an titawp hleithei lo a, a lo luhna lama awlsam taka man theihnaah check gate siam loin Serchhip daiah leh Aizawl daiah check gate an siam teh daih a, man tum tak tak lo an ang em em a, Central YMA lam lah check gate siam chinah hian an lung a awi ta a ang hle.

Engpawhnise smuggler-te tana awlsam taka chet vêl theihna tur hian tute emaw hi chuan remchang an siam emaw tih mai a awl a, smuggler-te zalenna ramah kan chang zo ang tih a hlauhawm hle a ni.