Hnathawh leh a nemnghehna lehkha thehluh
Tun hnaia Mizoram tlawha lo zin Union Minority Affairs Minister chuan Mizoramin a hun taka sum a hmuh theihna turin hnathawh tawhna (utilisation certificate) chu a hun taka thehlut ṭhin turin a chah a. Pradhan Mantri Jan Vikas Karyakram (PMJVK) hnuaia hnathawhte leh harsatna awmte state sorkar thuneitute nen an thlirho a ni.
India sorkar kal danah hian engkim langtlang leh fel fai taka kalpui tum a ni a, sorkar laipui aṭanga project an pawm tawh pawh a kalpui dan a fel tawk loh chuan a laklawhah pawh an tawpsan mai ṭhin. Hnathawh tawh chin, a thawh dan dik leh a sum hmanna utilisation certificate (UC) ṭha tak an phût ṭhin a, hemi kawnga hma la chak tura Minister-in min fuih hi a lawmawm rualin a zahthlak tel bawk thei ang.
Minority Affairs hnuaia kan sum zuk hnuh chhuah leh kan hmannate mipuiin kan hre tlang tawh a, hna lian tham thawk tura state pawn lam mi contractor lian tak tak rawih an ni chunga UC thehluh kawngah kan muang a nih chuan a fel hauh lo. State sorkar lam pawh a ṭan a ngai a, a hun taka sum a lo chhuah zel theihna turin tun aia chak zawka ke a pen a ṭul hle a ni.
Ramin hma a sawn dawn chuan infrastructure ṭha kan mamawh a, chumi chu kan state suma kan siam hleihtheih loh a nih avangin sorkar laipui ṭanpuina kan mamawh ṭhin.
Sorkar laipuiin project lian tak tak min rawn pe ve ta a, a hnathawh dan leh a sum hman dan kimchang thuneitute hnena thlen kawngah kan ṭuan a muang leh a nih chuan a fel lo a, Union Minister tur ngai tawh loin tun aia chak zawka hnathawh kan thiam a hun ta.