Kohhranin kuhva hralh harsatna an au chhuahpui ta

Mizoram Kohhran Hruai­tute Committee (MKHC) puipate chuan tun hnai khan sorkar laipui a Minority Affairs Minister of State an kâwm a, Mizorama kuhva huan neitute har­satna a rang lama sutkian a ṭul thu an thlen a; Assam state-ah Mizorama kuhva tharte kal­tlangpui phal a nih loh thu leh a chhante an tarlang a; a rang lama sût kian a nih theih nan hma la turin Union Minister an ngen.

Mizorama kuthnathawktu hlawm lian takin harsatna an tawh mêk chu an thil thar chhuah an hralh thei lo hi a ni. Kuhva chingtuten harsatna an tawh chhan chu pawn lam miin min tihbuai vang a ni lo a, Mizoram chhunga mite ngeiin dan phal loha kuhva an lakluh luih tlat vang a ni.

Kuhva rah tawlh ruk hi thil man harsa tak a nih hmel loh a, lirtheia langsar taka phurh ngai thil a ni. Heng lirtheiin check gate hrang hrang an paltlang thei hi thil mak tak a ni a, a tawpa a tuartu chu kuthnathawktute an ni a, hemi phena hlawkna lo teltu an awm a nih chuan kuthnathawktute hmelma an ni thei hial ang.

Tunah zet chuan MKHC pawh an rawn inrawlh ta hial a, kuthnathawktute harsatna tawh hi chingfel thuai a ngai a ni.