Raltlante hmalam hun tur

Kuki-Chin National Army leh Bangladesh sipaite inkah avanga sahimna zawnga Bangladesh aṭanga Mizorama raltlan mi 293 an awm mek niin sorkar official-te chuan an sawi a, chhawmdawlna ngaihtuahsak zel an ni.

Tun hnaiah Mizo­ramah raltlan chi hnih an awm mek a, Myanmar politics buaina avangin sahimna zawngin mi ṭhahnem tham tak chu Mizoramah an rawn raltlan mek a, tunah Bangladesh ram buaina avangin raltlan an awm leh ta bawk. Raltlante hi Zohnahthlak deuh vek niin kan unaute an ni a, sahimna zawnga Mizoram an rawn lut hi Mizote'n ṭha taka lo dawnsawn hi kan bat a ni a, kan tih tur dik tak kan ti mek a ni.

Miin harsatna lian tak an tawhlai, thih leh dam inkara an dinlaia an awm zel dan tura thu lo neih chiam hi a la remchang lo mai thei a, chutihlaiin thuneitute hian thui tak thlirin ruahmanna an siam ṭan erawh a ṭul hle mai.

Myanmar aṭanga raltlan an lo luhin a tirah an awmna tur siamin khung khawm an ni a, hun a kal zel a, raltlante hian hmun remchang apiang an pan darh a, sorkar leh tlawmngai pawlte tan pawh chawm reng an hautak hun a thleng ve thei a, DC lamin thuchhuahte an siam zui ta hial a ni.

Kan ram ṭhen­awm te en hian Mizoramah raltlan hi an la pung zel lo ang tih a sawi theih loh a, kan unaute'n sahimna an rawn zawng a nih phawt chuan kan hnar thiang lo a, ṭha takin kan lo dawngsawng tur a ni a; amaherawhchu thil thui zawk thlirin raltlante hmalam hun turah hian ngaihtuahna fing tak neih zel a ṭha hle ang.