Ruihhlo do leh Mizoram

Ruihhlo tawlh leh hmansual donaah awmze nei leh ngawrh zawka hmalak a nih theihna tura din Narcotics Coordination Centre (NCORD) hotute chu tun hnai khan Chief Minister hoin an ṭhukhawm.

Kan ram dinhmun thlir hian heti taka ruihhlo a hluar leh ta mai hian chhan hrang hrang a nei ngei ang a, politics-a inchirh thehna tel loin a chhan chhui chunga ṭan rual a ṭul hle a ni. Mi tam takin Myanmar raltlan an puh a, ṭhenkhatin zu khap vanga ruihhlo hluar niin an sawi a, ṭhenkhat phei chuan kuhva rah tawlh ruk tihtawp nena inkaihhnawih angin an puh ve bawk a, hengte hi chu rin thu mai a ni hlawm.

Ruihhlo do tur hian kan state chhunga lo lut tur ven ringawt a tawk lo a, kan inveng seng lo tih pawh a takin kan hmù mêk. Hei vang hian chik zawka zir chianna nena kal a hun tawh a, a ruihhlo lo lut sâ man tura theihtawp chhuah a pawimawh tluk zet hian ralrel thiam hi a ṭangkai ngei ang.

Ruihhlo ngai enkawlna kawngah sorkar a ṭan a ngai a, tuna sorkar hian ruihhlo ngai enkawl lam kha an term tir lamah khan an tuipuiin an sawi uar hle ṭhin. Tunah hian a taka kalpui a ṭul takzet tawh a, kan ṭhalai heti zat ruihhlo avanga buai mekte chhanchhuahna hmunpui ṭhahnem zawk siam hi kan mamawh a ni. Hemi atan hian sum sen belh ngai pawh a tam dâwn a, sorkar hian a ngai pawimawh a nih chuan sum pawh a pek chhuah phal zel a ṭul ang.

Tunlaia ruihhlo hluar dan leh min nghawng dan tur ngaihtuah hian, kan dinhmun hi a ṭha lo takzet tawh a, ruihhlo do turin fing tak leh ṭhahnemngaihna tak tak nen ke pen a ṭul ta.