Eirawngbawlna gas sem dan

December 1, 2022 aṭangin Aizawl khawpui leh district khawpuiahte eirawngbawlna gas mamawhte an inah pek (home delivery) a ni tawh dawn a, hei vang hian, home delivery kalpuinaah chuan common point delivery (delivery/distribution point)-a gas sem tihtawp a ni dawn.

Eirawngbawlna gas sem dan hi zawi zawiin a inthlak chho zel a, state dangte ang bawka in lama gas sem chilh a ni tawh tur hi thil lawmawm tak a ni. Tun hma deuh kha chuan distributor-ten an awmna hmunah an sem mai ṭhin a, eirawngbawlna gas la turin hla tak taka kal a ngai fo.

Tun hnu deuhah veng hrang hrangah a semna awmin lirtheiin a semna hmunah an rawn phur ṭhin a, tunah chuan inah an sem ṭhin tawh dâwn a ni.

Hei hian thil tam tak a keng tel dâwn a, mipuite tana awlsamna thlentu tur a nih rual hian harsatna ṭhenkhat pawh a keng tel ve bawk ang. Hun eng emaw chhung chu inzirna, in enchhinna angin kalpui a ṭul dâwn a, mipuite pawhin kan dawh theih a ṭul ang.

Hetihlai hian mipuite hriat tur zirtir kawngah thuneitu lamin ṭan la se, mipui hriat tur puanzar ṭhat a nih loh chuan buai lohna turah mipui an buai fo a, pumpelh theih harsatna a thleng ṭhin.

In lama eirawngbawlna gas sem an ṭan hnua kan buai lohna turin, inzirtirna uar lehzualin kalpui ni se, tun hi ṭan lâk hun tak a ni ngei ang.