Zirna leh sorkar

School Education Minister chuan, zirnain hma a sawn loh chuan hmasawnna hrang hrangin awmzia tak tak a neih loh thu a sawi a, "Mizoram sorkarin zirna a ngai pawimawh a, zirna lama thawk tur mi 2,800 chuang lak an ni tawh a, heng zingah hian a ngheta lak 100 bawr an awm. Tun hmain zirna sikul hrang hrangah zirtirtu pahnih khat lek awmna a tam hle a, tunah erawh chuan sikul tam takah zirtirtu dah belh a ni," a ti.

Mizoram sorkar hian zirna kawnga hmasawn tumin theihtawp a chhuah a, kan thlen chin erawh a la ropui lo hle a tih theih ang. Kan zirna a lo tlak hniam nasat tawh avangin tunah chuan zirtirtu dah belh ringawt te pawh uar takin kan sawi tawh a, hei hi kan state thlen chin a la ni mêk.

State/ Union Territory ṭhenkhatin sorkar sikulah zirlai an ko kir leh ṭan mêk a, sorkar ṭanlakna rah a takin a lang a, mipui pawhin sorkar sikulah rinna an nghat ngam. Kan ramah chuan sorkar sikulah zirlai an tlem em em a, Covid-19 hripui len hnuah zirlai an pung hret a nih pawhin zirna a ṭhat sawt vang lam aiin chhan dang vang a nih zawk a rinawm.

Engpawhnise Mizoramah hian zirnain hma a sawn dâwn a nih chuan private school-a innghah ngawt a theih loh a, sorkarin a zirtirtu neihte a tuai hriam a, hmasawn tak tak tura ṭan lâk a pawi­mawh hle a ni.