Central sum kan tichingpen em ni?

Ministry of Minority Affairs enkawltu Union Minister of State chuan Mizoram sorkar chu central aṭanga sum lo kal tichingpenah a puh a; a ministry enkawl hnuaia cheng vaibelchhe 1,000 chuang Mizoram sorkar an pek tawhah sum hman dan (utilisation certificate) pek tur an neih loh thu a sawi.

Union Minister of State-in Mizoram sorkar a puhna ṭawngkam hi a na hle mai a, NDA leh NEDA hnuaia thawk dun ni si heti tak maia naa an insawisel hian ngaih a tiṭha lo hle a ni. BJP mi leh sa Minister-in Mizoram sorkar chet dan a sawi hi dawt a nih loh ngat chuan Mizoram mipui hian kan ngaihven thar a ṭul a, pawisa tihchingpen zat a sawi hi a ṭhahnem tham hle bawk a ni.

Mizoram hi thawh chhuah nei lo state kan ni a, kan sorkar awm tawhte hian mahni kea din lam aiin central aṭanga sum sik chhuak thei nih an la thlang zawk a, a dil chhuak tam chu Minister ṭha tehnaah kan hmang emaw tih mai a awl hle.

Tunah zet chuan a sum kan zuk dil ṭhin berte'n kan state min sawi lêt dan kan hre ta a. An sum min pek a nihna loa hmangah min puh a, "An chhungte tihlen nan nge, inthlan awm leh tur atan an dahṭha zawk tih hriat a ni ta lo...," titu hi Minority Affairs enkawltu Minister a ni a, Mizo mipuiin ngun taka kan ngaihtuah zui a ṭul takzet a ni.