Central sorkar sum kan hmanna

Sorkar laipuia Food Processing Industries leh Jal Shakti enkawltu minister of state Prahlad Singh Patel chuan, Kolasib district-a Zoram Mega Food Park-in a rilru a tihnat thu a sawi a; Mizoram sorkarin in tina tui herh haw a nih theihna tura hmalakna Jal Jeevan Mission (JJM) a kalpui dan ṭha a tih loh thu a sawi bawk.

Tun hnaia Central Minister lo zinten Mizote tana thu ngaihnawm lo tak tak an sawi kan hre ta zauh zauh mai a, tute emaw sum hman dan avangin a state pumpui hi min hmùh dan a dik lo ang tih a hlauhawm ta khawp mai.

Kan state hian sum thawh chhuah sawi tham a neih loh avangin central sorkar-ah kan la innghat zel lo thei lo a, anni hnen aṭanga kan sum hmuh ang angte kan hmang dik lo a nih chuan kan tuar zel dâwn niin a lang.

Kan ram dinhmun kan thlir chuan kan politician ṭha leh chak kan tihte pawh sorkar laipui aṭanga sum hai chhuak hnem thei, tih lam a ni. Chuti a nih laia kan sum hmuh ang chhun chhun kan hman dan a fel lo lehzel a nih chuan Mizoramin a la tuar zel dâwn a nih hmel.

Heng kan sum hmangtute hi mipui lam pawhin kan hriat chian an ṭha hle mai a, a tawpa a hming chhiat kan inṭawm leh si avangin a mawhphurtu lam hi kan chhinchhiah a ṭha hle ang.