AMC dan zawm lo

Aizawl Municipal Corporation (AMC) Enforce­ment Committee chuan, AMC Building Regulations, 2012 zâwm loa Chanmari venga in sak chu tun hnai khan an kalhsak.

AMC hian in sak chung­changah dan fel tak a nei a, heng dante hi zawm turin mipui min phut a, dan zawm lote chungah action lâk theihna a nei bawk. Tun hnaiah building pakhat chu kalh a ni a, he building sakah hian vawi khat mai ni lo vawi tam tak dan a zawm lo tawh niin an sawi.

Dan thil a nih tawh hi chuan dan hre mi ni ve lo tán chuan awih chin tur leh pawm chin tur hriat a harsa a, chutih rualin thuneitu lamin dan bawhchhiatna awm nia an hriat avanga kalhsak ngai building a awm hi a zialo hle a ni.

Engpawhnise mimal in luah tur ni lo, sikul, damdawi-in, hall, biak-in leh vantlâng pan khawm ṭhin in hrang hrangte hi chu a theih chhung chu lirthei dahna ṭha zawk, mipui tán pawha hmun âwl (space) awm thei zawka sak theih ni se a ṭha hle.

AMC hian dan a zam ṭhin a, thil ṭhenkhatah chuan an bawhzui ṭha tawk lo a, a kengkawhtu lam pawhin an tlin loh dan an siam em ni, tia zawh theih chang te a awm. In sak chungchangah hian dan leh hrai zawm tur a tam hle mai a, a satu lamin an duh hunah pawh sak hleihtheih loh khawpin thawktu lam indaih loh changte a awm ṭhin.

Tun ṭuma in kalhsak chung­chang hi a chin chhuaka hre lo tán chuan sawi zui thiam a harsa a, chutih rual chuan in sak chungchangah mipui tana awlsamna leh ṭhatna thlen zui lem lo harsatna leh buaina thlen thei dan a awm nge awm lo, tihte hi ennawn theih ni se, chumi piah lamah dan bawhchhia an awm a nih chuan dan ang taka hmalak zawm erawh thil ṭha tak a ni.