Health Care-a mipui pawisa thawhkhawm hmanna hi

Mizoram State Health Care Scheme (MSHCS) a mipui inziah luhna sum tling khawm zinga Rs 7,28,89,880 chu sorkar inrelbawlna atan hman a nih thu ZPM Thalai President chuan a sawi a; zinna senso, thawktute hlawh, training pekna, office inrelbawlna leh thil dangah hman a ni.

Sorkarin health care scheme a siam hian mipuiin an thawh ve tur a awm ṭhin a, chu chu mipui lam chuan ṭha taka thawhin chumi hmang chuan an inziak lut a ni.

He pawisa hi chu health care-a pawisa awm sâ belh­chhahna tura mipuiin an tum ve tur an thawh khawm ni awm taka a lan lai hian, a sorkar zawk hian damlo inenkawlna bill batsak chungin pawisa awm sa chu inrelbawlna atan a hmang chiam mai niin a lang a, a fel lo hle.

Health care scheme duangtu lam hian mipui thawh khawm hmanga thil tih a tum a nih chuan inbumna a ang hial ang. Mipui hi chuan sorkar pawisa awm saah an thawh ve tawk tur a hmingin an thawh tur nia a lanlaiin sorkarin Rs 7,28,89,880 zet mai inrelbawlna atan a hmang peng hi damlo inenkawlna tura thawh khawm mipui sum ruksak a ni thei hial em?