Dan loa Myanmar aṭanga kuhva luh chhan Central thiam loh nge Mizoram mit siai vang?

Mizoram aṭanga Rajya Sabha MP chuan Myanmar aṭanga dan loa kuhva ro a lo luh theih chhan chu central agency pahnih Assam Rifles leh Central Custom inthlahdah vang niin Parliament-ah a sawi chhuak a, "Heng agency-te hi mawhphurtu awm chhun an ni," a ti.

MP hian Mizo­rama kuhva thartute'n an kuhva thar an hralh theih loh thu a au chhuahpui a, dan loa kuhva lo lutte nen hriat pawlh loh tur a nih thu leh hmar chhaka kuhva tharte zalen taka hralh a nih theihna tura hmala turin thuneitute a ngen a ni.

MP ṭhahnemngaihna hi thil lawmawm tak a nih rualin Mizoram sorkar thiam loh awm ve miah lo ang maia a zuk sawi fihlim hi chu a dik lo mai thei a, ngun zawka ngaihtuah a ṭhat hmel e. Kan rorelna in sangah ngei Mizoram sorkar thuneitute chuan 'mit an siai' khum tih an sawi tawh a, dan loa kuhva lo lut hi an hre lo a ni lo a, an hre lo der zawk a ang ta hle.

Parliament House lamah chuan MNF party lam candidate MP-a thlan tlin tak chuan dan loa kuhva ro lo lut na takin a do a, a luh tlang chhanah central agency a puh a, an thiam loh thu a sawi. Hetihlai hian Mizoram rorelna in sangah chuan kan hotute'n dan loa kuhva lakluh hi mit an siai thu zep loin an puang ve bawk.