Hausak thut leh Mizoram

Mizoram Chief Minister chuan tun hnaiah hausak thut duhna avanga dik lo taka sum lakluh pawi tih lohna a lansarh thu a sawi chhuak a; sorkar leh pawl pakhat emaw, kohhran ang chauha do hneh theih a nih loh avangin ram pumpui mipui thawhhona a pawimawh thu a sawi.

Mizoramah hian hausa thut an tam hle tih a takin kan hmu mek. Tun hmaa an thawh sawi tur mumal awm si lo, vawi leh khata hausa thut tura thiamna sang an neih pawh hriat ni lo; nimahsela hausa tawntaw ni ta mai hi sawi tur an awm ta nual mai.

Ṭhenkhat hi chu chiahpuam, khehpuam leh kuhva tawlha rinhlelh kaite pawh an ni a, ṭhenkhat hi chu politics 'khel fuh' an tih mai ruling party mi leh sa nih vanga hlawk tham contract leh supply hmu tharte pawh an ni ang. Ṭhenkhat chu rangkachak leh thil dang dan phal loh smuggling lian thama inhnamhnawihte pawh an ni thei ang a; hausa thut kan tih zingah hian contractor ni si lo contractor-te hming hawha hna thawk leh contract lian tham hralh ching te pawh an tel ang.

Heti tak maia belhchian dawl loa mi hausa tharlam kan neih belh zel mai hi a manganthlak a, hei hian a lehlamah nghawng ṭha lo a neih tel zel avangin thil chhe zawk a hrin lohna tura inven a ṭul hle a ni. Thawhrim te, taima taka lehkha zirte leh mifing leh remhria nih aia dan dik chiah loa chet hreh loh avanga hausakna hian ram a tichhia a, ṭhangthar tam takte rilru a tihnual thei bawk a ni.

Tunah zet chuan kan Chief Minister ber pawhin a vei ta a, hausa thut an tam tih a nemghet bawk a ni. Chief Minister sawi ang hian a ram puma do chi a ni a, sorkar hi hausa thut veng thei ber tur a ni a, a ṭan ngam tak tak chuan dan dik loa hausa thut tam zawk hi chu a veng thei ngei ang.