Central thu kenkawh duh chin kan nei em?

Mizoram sorkar chuan Lesbian, gay, bisexual, trans­gender, queer and intersex (LGBTQI)-te tana shelter home sak a tum chu nawrna leh sawiselna tam tak avangin a ṭhulh a, Central YMA chuan tun hnai khan Chief Minister chu he thil chungchang hi an lo sawipui tawh a ni.

Neih inang inkawpte leh chumi kaihhnawihte puala in sak hi Mizoram sorkar rawt a ni lo a, UD&PA department-in sorkar laipui aṭanga thu an hmuh bawhzuiin he in hi sak an tum a ni. Sorkar laipuiin nawr mah se, kan sakhua leh hnam tana him lo leh ṭha tawk loa ngaiin nasa taka sawisel a ni a, Mizoram sorkar pawhin a kalpui zui dawn ta lo niin a lang.

Mizoram sorkar chuan September 1, 2022 aṭang khan lirthei kaihhnawiha dan khauh tak mai Motor Vehicles (Amendment) Act 2019 chu a hmang ṭan. He dan hnuaiah hian lirthei leh a kaihhnawiha dan bawhchhiate hremna chu a lêt tam takin a pung a, Mizoram sorkar aiawhte chuan hei hi central aṭanga hmang tura nasa taka nawrna an dawn avanga hmang lo thei lo niin an insawi.

He dan hnuaiah hian lirthei khalhtute pawisa chawi a pung nasa a, tunah phei chuan helmet-ah ISI mark chuang chauh khum theih tih a ni zui a. Mi tam takin harsatna an tawh phah a, nimahsela dana inziak a nih miau avangin sorkar chuan dan angin thil a kalpui ta zel a ni.

Ngun taka kan ngaihtuah chuan kan sorkar hian a duhna chinah chuan sorkar laipui pawh hi a hnial fo a, central sorkar rawtna leh thupek hi a zawm diak diak lem lo.

Hetihlai hian pawisa dawn belhna tur chi leh state sorkar sum hmuh belhna turah chuan dodalna leh sawiselna karah pawh, "Sorkar laipuiin min nawr si," tiin dan hi hmang lo thei lo angin a insawifiah fo a. Kan sorkar kalphung hi mipui tan awih chin tur hriat a harsa ta hle a ni.