Minister ban chungchang

Minister of State Dr K Beichhua chu a hna aṭangin a bang a, Chief Minister hnen aṭanga chawl tura tihna lehkha a dawn avangin banna hi a thehlut a ni.

Ram inrelbawlnaah hian Minister bang hi an awm tawh ṭhin a, thil thar a ni lo. Chief Minister-in Minister-te hna chanpual tih danglam a duh avanga insiksawite pawh a awm tawh ṭhin a, sorkar laipuiah pawh Minister-te hna chanpual thlak danglam hi a awm fo a, tun term-ah pawh chu chu kan hmu a ni.

Ramin a ṭhat­puina tur zawk emaw, a chang chuan ruling party tana ṭha tur zawkin emaw Minister-te hna hi an lo siksawi fo tawh a. Inthlan a hnaih deuhah political party chhung enkawl tura an duhte pawh Minister aṭanga chawlhtirin political party lama insawr bing tura tihte pawh state ṭhenkhatah leh sorkar laipui thlengin a lo awm tawh.

Tun ṭuma Mizorama kan Minister pakhat an ban dan erawh titi titam deuh a awm a, chawlh hahdamtir satliah ni lo, sorkar insiksawi hrim hrim duhna lam ni loin thil dang inrawlh nia rinhlelhna a tam hle. Chief Minister-in banna thehlut tura a tihna nia lang a lehkha ziah chu social media lama darh chiam mai bawk a, mipui lamin an sawi zui zel a nih pawhin a mak lo ang.

Engpawhnise Chief Minister chuan a duh angin Minister a ruat thei a, a duh a thlangin a duh loh a paih theih a; Mizoram sorkarin chak leh ṭha zawka hna a thawh theihna turin Minister-te hna chanpual pawh a siksawi zel turah i ngai ang.