Zangnadawmna dik lo beiseitute

Land Revenue & Settlement (LRS) department chuan, Aizawl Bypass Road siamna tur leh lei verh tur chungchangah kawngpuiin a paltlang turah pass khawih chêt phal a ni lo tih hriattirna a chhuah a. LRS department notification-a tarlan danin, Two laning of Aizawl Bypass including Tunnel (Connecting Sairang on NH-06 to NH-02) kawngpui siam tumin a pal­tlang tur ramah kutthlak phal a ni lo a, ram pass dilna leh ram ṭhen dilnate chu khawih phal a ni lo.

Ramin hma­sawnna hna a thawn dâwn a, hna ṭhulh phah ṭhak leh harsatna thlen khawpin zangnadawmna lam buaipui tel a ngai ṭhin a, a vanduaithlak takzet a ni.

Tunah chuan a sorkar pawh a harh chhuak ta a, a tir aṭangin a inveng lawk thiam a, a lawmawm takzet a ni. Hetihlai hian Kolasib District-a kawngpui siam thar tura ram pass siam danah rinhlelhawm tam tak a awm a, a siam ṭha theitu dinhmuna ding ngeite a rinhlelhawm zingah an lang tel a, tute emaw hmelhriat hnai thlengin midang hming hawha ram leiin pawisa an thap tih thawm hriat tur a awm a, a tak ni lo se a ṭha ngawt ang.

Kawngpuiin a paltlang tur ram lo hre lawk a, ram lo lei khawm tawk an awm niin an sawi a, midang hminga sum ṭhahnem tham tak lâk tum leh rinhlelhawm khawpa hna­thawktu siksawite thlengin a awm niin an sawi a, a zialo hle a ni.

Aizawl by-pass road siam tur lamah erawh thuneitute an inveng lawk ta a, zangnadawmna hminga pawisa siam tum awm tawh lo se. Project danga zangnadawmna dawngtu leh dawn tumte pawh hi mipui hian rin zawn an nei ṭhup tho tho a nia.