Sorkarin a tum phawt chuan Kuhva tawlh ruk hi a dan theih ang

Chief Minister hoa Central YMA hruaitute leh mi pawimawhte ṭhukhawm chuan, kuhva rah ro tawlh ruk leh ruihhlo venna turin check gate leh duty post a tam thei ang ber siam an rél.

Hun rei tak chhung Mizorama titi lian ber pakhat leh chhungkaw tam tak eizawnna tibuaitu chu Myanmar aṭanga kuhva ro tawlh ruk hi a ni a, khaw thlang lamin huaisen taka an do chung pawhin Mizoramah lian tham taka phurh luh a la ni reng tih a hriat theih. Kan rama kuthnathawktute thar chhuah sâ pawh hralh theih loha siamtu smuggling kan sorkarin a dang thei lo hi chu thil mak angreng tak a ni.

Kuhva hi ruihhlote anga thuhruk awlsam a ni lo a, lirtheiah langsar taka phurh ṭhin a ni. Hetiang thil lian tham man tur hian check gate tam tak siam pawh a ṭul ber lo mai thei a, Myanmar aṭanga a lo luhna chân khânah rinawm taka ven check gate awm se tihtawp theih a ni ngei ang.

Tunah hi chuan Mizorama a luh vek hnuah lo dan kan tum a, CYMA nawrna vangin Aizawl daiah leh Serchhip daiah check gate siam belh a ni a, a sawt lem lo niin a lang. Tun hnaiah Mamit leh Kolasib District lam mipui an mangan tak avangin CYMA leh sorkar tán pawh chet chhuah loh theih pawh a ni ta lo.

Ruihhlo tihrem tum leh a lo lut tur ven hi thil harsa leh huphurhawm tak a ni a; Myanmar aṭanga kuhva tawlh ruk hi chu sorkarin a duh a nih phawt chuan tihtawp theih loh tur niin a lang lo. 'Sorkarin a titawp thei nge thei lo tih lam aiin sorkarin a titawp ngam dâwn em?' tih hi zawhna tur a ni zawk awm e.