Zana lama ven ngai Aizawl traffic

Mizote'n kan hunpui ber kan thleng chho mek. Hripui léng avanga kum hnih chuang Krismas leh kumthar kan lawm theih loh hnuah nunphung pangngaiin hunpui lawma hmang turin kan inbuatsaih leh thei ta a, a lawmawm tak zet a ni.

Aizawl khawpuiah mipui an pung khawm an ṭhahnem leh ta hle a, tunlai hian traffic jam pawh a nasa leh ta a, zanah pawh traffic jam a nasa ṭhin hle.

Chawlhkar liam ta chhung khan No Tolerance Week/Drive hman a ni a, chuvang chuan chhun lamah lirthei tlân chhuak a tlem hret niin a lang. Chutih laiin, zan lamah erawh chuan Aizawl khawpui kawngpui lûn laiah chuan traffic jam a nasa thung a, kum dang zawng aiin a nasa niin a lang. Chhun lama traffic jam-a din aiin, zana traffic jam-ah tàn rei a awl mah niin a lang ta.

Lirthei document felfai lote zan lamah an tlân chhuak ṭhin a nih ngei hmel a. Chu chuan traffic jam a tizual a ni thei. Lirthei chungchangah hian sorkar lama thuneitute'n chhûn lamah dan ngai pawimawha an kenkawh ṭhat ang tho hian zan lamah pawh kengkawh ṭha se, mi tam takin zana traffic jam vanga harsatna an tawhte a ziaawmin a rinawm, mipui tan pawh a him zawk ngei ang.

Zan lama traffic buaina ching feltu tur traffic police duty in dah belh a ṭul ta a ni ber a. Mipui himna leh rálmuanna kan ngai pawimawh ta sa sa, zan lamah hian traffic jam nasa lutuk a lo ziaawm theih nan leh zu rui nia hriatte thlenga hnawksak khawpa an chet vel theih lohna turin kan police-te'n ṭan han la leh sauh sauh se. He hun puiah hian kan khawpui hi a nuam lehzual ngei ang.