Rulh leh tura sum puk

Mizoram sorkar chuan Open Market Borrowing kal tlangin cheng vaibelchhe 150 a puk leh dâwn a, tun sorkar kum 2022-23 chhunga ṭum ruk a pukna tur a ni ang.

OMB hmanga sum pûk hi kum khatah a pung vawi hnih rulh tur a ni a, kum 10 velah pawisa pûk zawng zawng rulh a ngai a; a punna hi 7-8% vel a ni. Mizoram sorkar hian tun sorkar kum chhungin OMB hmangin ṭum ruk loan a pûk tawh a, chu chu cheng vbc. 740 a tling.

OMB hmanga RBI aṭanga sum pûk phalna Mizoram sorkarin a neih hi cheng vbc. 990 a ni a; cheng vbc. 740 a pûk tawh baka cheng vbc. 150 a pûk leh chuan cheng vbc. 890 a pûk dawn ta tihna a ni.

Sorkar sum enkawl hi thil harsa tak a ni ang a, a bikin sum deh chhuah nei lo state-ah a harsa zual ngei ang. Mizoram hian thawh chhuah sawi tham a neih miau loh avangin sum enkawl kawngah hian harsatna tam tak a tawk tih hai rual a ni lo a; hnathawhna atana sum bat leh bill táng chu sawi loh sorkar hnathawkte hlawh pawh a hunah a pe thei ngai lo.

Sorkar ve riang ruang tán chuan hnathawkte hlawh pek theih loh hi thil zahthlak tak a ni a, hei vang hian kawng hrang hrang dapin sum pûk dan a zawng kual mêk niin a lang. Asian Development Bank leh NABARD aṭangin sum ṭhahnem tham tak a pûk tawh bawk a, hengte hi rulh leh tur niin a nihna takah chuan Mizoram mipuite leiba a ni.

Sum puk tur a awm avanga pûk nelh zel hi nakina kan state phurrit belhchhahna tur a ni. Kan sum neih sate hman thiam zir a, a inren theihna tur zawna inren a, ṭhang leh tharte tana leiba hnutchhiah ṭeuh loh hi kan sorkar hian tum hram rawh se.