Traffic dan bawhchhiatna

Aizawl Traffic Police leh Transport department-in December 12-17, 2022 chhunga Aizawl khawpuia inngaihhnathiamna awm loa dan bawhchhiate manna hun, No Tolerance Drive an kalpuiah dan bawhchhia mi 229 manin, pawisa an chawitir a, pawisa chawi tling khawm chu cheng nuai 8.21 a tling.

Mizoram sor­karin hetiang a buatsaih hi thil ṭha leh ṭangkai tak a ni a, he hun hman chhunga Aizawla lirthei a vang duak mai kha a ngaihṭhatthlak loh hle zawk a ni. Hetia lo thlir mai chuan lirthei document kim loa khalh ṭhin hi an tam hle niin a ngaih theih a, sorkarin dan khauh zawka a kalpui zel a ṭha ang.

Chutihlaiin a hun thuah erawh sorkar lam hian ngaihtuahna zau zawk hmang thei se, kan hunpui ber a thlen dawna lirthei endik runpui buatsaih hi chu a inhmeh vak lo. Hun thawl remchang ṭhaah regular zawka lirthei endik runpui neih hi thil ṭha tak a nih hmel.

Mipui lam pawh kan ṭan thar a ngai a, lirthei document fel loa khalh leh driving license nei mumal loa khalhte sim a, dan zawm i zir thar zel ang u.