Aizawla two wheeler taxi

Aizawl Two Wheeler Taxi Association (ATTA) chuan kum 2023 aṭanga chawlhkar khata ni hnih zel ding tura sorkarin ruahmanna an siam chu an duh loh thu leh, traffic jam zel lohna turin two wheeler taxi permit pe chhuak tawh lo tura an duh thu an chhuah.

Aizawla two whee­ler taxi ṭang­kaizia kan hria a, a awlsam leh ran zawk avangin mipui pawhin an hmang duh hle. Hetihlai hian two wheeler taxi hi an ṭhahnem ta hle mai a, khawpuia kawngpui awm dan nen ngaihtuahin a permit pek belh zel hi thil ṭha ber a ni kher lo ang.

Two wheeler taxi neih hi eizawnna tling a ni a, chhung­kaw tam tak innghahna a ni bawk; nimahsela permit pek belh zel a nih chuan an hlawk lo sawt dawn tih a chiang. Hei bakah hian an tlan hun chhung tihtlem a nih chuan an road tax pek te, ṭhenkhatin driver hlawh an pekte nen khaikhin chuan hman ṭangkai loh ni a pung dawn tihna a ni.

Khawpuia traffic jam tihziaawm tumin sorkarin ruahmanna lian tak a siam a, PAHOSS-ah ringawt pawh sum tam tak a seng a, chutihlaia traffic jam tizual theitu two wheeler taxi permit pek belh zel ringawt hi chu a fuh lo.

Kar khata ni sarih awma ni hnih chhung din ngai khawpa tam two wheeler taxi neih pawh hi a fuh lo. Mi ṭhenkhat tana eizawnna ṭha tak hi mi tam zawkte tana eizawnna mumal mang loah a chhuak palh thei a; tun hma aṭang tawha tih ṭhan commercial vehicle permit hmanga politics khelh hi bansan theih a ṭha khawp mai.