Thlà 2 chhunga nuai 19 chawitir

Mizoramah Motor Vehicles (Amendment) Act, 2019 hman a nih hnuah October 1 aṭanga November 30, 2022 thleng khan ni 61 chhungin Aizawl khawpuiah lirthei dan bawhchhia 2,425 man a ni a, pawisa chawi tling khawm chu Rs 19,60,300 a tling.

Lirthei hmanga dan bawhchhiatna avanga thlà hnih chhunga cheng nuai 19 zet mipuiin an chawi hi ngaihtuah zui tham a ni a, kawng hnihin a thlir theih ang.

Pakhatnaah chuan mipuiin dan kan bawhchhe nasa hle tihna a ni a, lirthei document nei kim lo leh lirthei khalhtu dan bawhchhia kan tam hle tihna a ni a, hemi kawngah hian mipuiin hma kan sawn a ngai hle.

Thlir dan pakhatah chuan thlà hnih chhunga sorkarin cheng nuai 19 mipui aṭanga a khawn hi sorkar tán 'income' tha tak a ni a, financial year khatah cheng maktadûai tel an khawn chhuak thei mai dawnin a lang. Hei hi sum leh paia sorkar pachhe takin Motor Vehicles (Amendment) Act, 2019 a kalpui chhan a ni thei em, tih zawhna a piang lo thei lo. Sorkar laipui lam chuan he dan khauh tak hmang ngei tur hian state tinte a hriattir ngei mai a, nimahsela state zawng zawngin an kalpui lem lo a, a kalpui lote hremna a awm hek lo. Mizorama he dan hman a nih dâwn khan sorkar official lam khan an sawifiah nasa hle mai a, mipuiin an pawm lo chung leh hnawk an ti chung an kalpui lui ta a, mipuiin an tuar ta hle tih an sum chawi aṭangin a lang.

Mipui nawlpui ni loin a dan zawm lote hi a tuartu tur chu an ni ngei a, dan zawm lo na nâ nâ chuan pawisa tam deuh an chawi a nih pawhin an chan tawkah kan dah thei a; chutih rualin heti zat zet pawisa khawn chhuah a nih aṭang hian kan dan hman hi chu mipuiin an la zo lo deuh niin a ngaih theih bawk ang.