Krismas 'ruaiṭheh ni'

December 26 hi Mizorama kohhran pawl tam ber hian Krismas lawmna ruaiṭheh hun atan kan hmang ṭhin a, kan ṭawngkamah pawh 'ruaiṭheh ni' tiin kan sawi mai ṭhin.

Kum hnih zet Covid-19 hripui avangin kan duh angin Krismas kan läwm thei lo a, kohhran tam berin kum hnih chhung Krismas lawmna ruai pawh kan ṭheh thei lo. Hei vang hian vawiina ruaiṭheh pawh hi tun hma aiin an ṭhahnem zawk hial mai thei a, hripui tel loa zalen taka ruaiṭheh hi a hlu dâwn bîk hle niin a lang.

Tunlai hian Covid-19 hri thar ( BF.7 strain) chu China-ah a lêng nasa leh tawh hle mai a, khawvel pawh a tiralkhel leh ṭan ta. Kum 2019 December-ah khan China-ah Covid-19 a hluar ṭan a, a tirah India kha a thleng lawk lo a, a tawpah a tuar na zinga mi kan ni. Tuna hripui hian India lut tawh lo se, kan nunphung tibuai tawh lo se kan duh ṭheuh a, kan boruak kal zel dan tur a hriat theih loh avang hian kumin Krismas lawmna ruai na nâ nâ chu âm takin ṭheh ang u khai.

He lawmna ni kan tawng hi kan vannei a, ruaiṭheh theia kan dam hi kan nihlawh, tlai leh puar takin Krismas lawmna ruai i ṭheh ṭheuh ang u.