Hunpui awllen tu leh fate tana hman ṭangkai

Krismas kan lo hmang zo leh ta a, Kumthar lo thleng tur hmuakin Mizoram châng ni loin khawvel a inbuatsaih mêk a ni. He hun hi awlthawn hun/chawlh (holidays) anga ngaih a ni deuh ṭhin a, sorkar pisa lam pawh chawlh ni chiah lo mah se dan pangngaiin a kal thei ṭhin lo.

Kum a tawp dâwn tawh hi chuan mi nawlpui hi chu kan inthlah zalen deuh ṭhin a, thingtlang lo nei tam zawkin hna an zo tawh a, hma thar an la lâk chiah loh avangin an awl hun a ni a, sikul leh college zirna chawlhlai a lo ni bawk nen, sorkar pisa lam pawh chawlh ni chiah loin a thawl ṭhin hle.

Heng hunah hian chhungkaw fing deuh chuan an fate tih tur an zawnsak thiam a, ṭhenkhatin hnathawh tur an siamsak bawk a, ṭangkai takin an hmang.

A hmang ṭangkai thiam lo tán chuan nun hlohna remchang tak a ni ve thei bawk a, zirna lamah an chawlh lai a lo ni a, hunpui boruakah nun a lo zalen bawk nen inthlahdah a awl a, ṭhenkhat tán kumkhuaa an chhiatpui theih suala tluk ṭanna a ni thei.

Nu leh paten he hun pawimawh tak mai hi thiam taka kan hman a ṭul a, kan fate pawh chik zawka kan ven a ṭha ang a, heng hun thawl nuam tâk hi ṭangkai zawk leh ṭha zawka hman dan a awm ngei ang a; he hun âwlah hian kan chhungkaw mil tawkin kan fate khawsak kan relpui a ṭul hle a ni.