Halpuah hal lo tura ngenna

Mizoram sorkar chuan hunpuiah halpuah hal lo turin mipuite a ngen a, halpuah leh puak thei thil dangte lakluh khapin dan bawhchhiate a man a, halpuah khapna khauh takin a kalpui mêk a ni.

Hetihlai hian kumhlui thlah zanah hian khawpuiah chuan halpuah hal tawk hi an awm leh deuh ziah tawh a, tlem lai deuha kan inzirtir uar lai kha chuan Aizawl khawpui pawh December 31 zanah thawm nei mang loin a awm thei a ni.

Tun hnaiah hi chuan December 31 zan laiah hi chuan khap loh ang maia a lan changte a awm ṭhin a, puak thei chi hrang hrang an hal nasa ṭhin hle. Heng haltute hi a sorkar lam hian a man leh tak tak ngai si lo a, khapna thupek chhuah hnua dan bawhchhiat hrem loha an awm hian midang a tihuangtau ṭhin pawh a ni mai thei.

Hman kumah khan Chief Minister chenna in ni ngeia hriat aṭanga puak thei thil hrang hrang hal a nih thute a darh a; Minister ni ngeia hriatin kumhlui thlah zanah halpuah hal mai duhtawk loa silai a kah hialna video-te pawh a darh tawh bawk.

Engpawhnise halpuah hal tur hi inkhap sen a ni lo mai thei a, khap rêm hi thil huphurhawm tak a ni a; a invaukhan leh thupek hmanga beih aiin a zirtirna lam hi uar zawkin kalpui ni ta se a ziaawm thei deuh ang em?