Contract ṭha lo 'kaikuang' chhui a ngai

Bualpui Ng khawtlang chuan an khaw damdawi-in (Primary Health Centre) tur sak mêk chu a hna a chhiat avangin tun hnai khan an chhu chhia a, an chhut chhiat hnu hian a tira an hriat aia a chhungril a lo chhiatzia an hmuh chhuah belh niin an sawi.

Bualpui Ng mipuite hi vawi leh khata thinrim thut an niin a lang lo a, hun rei tak aṭang tawhin contractor hna ṭha lo hi an lo ngaimawh tawh a, YLA lamin stay order pawh an lo pe hial tawh a ni. An hnathawh tawh leh an thawh mekte an hmuhin lungawi harsa an ti a, hna ṭha zawk beiseina avangin khawtlang mipui chuan an ṭhiat ta hial a ni.

He thil thleng vanduaithlak tak mai hi hetia en liam mai chi a ni lo a, contractor leh amah thlangtu lam te, contract hna viltu sorkar official lamte leh he department hnuaia hmun danga contract thawh tawh zawng zawngte thlenga chik taka chhui a ṭha ngei ang.

Mizorama thil pawi tak mai chu politics hi 'business' anga kalpui tum tlat kan nei ṭhin hi a ni a, chu chuan contract leh supply hna kan inpek dan a nghawng a, chu chuan kan infrastructure nasa takin a sawp a, 'kut tling loa hausa' tia puh theih hial tur ruling party worker zingah hausa thut tam tak a hring a, roreltu party an inthlak pawhin a kalphung inthlak loin a titu an inthlak a ni lek a, hetiang zela kan kal chuan kan hmabak hi a êng lo hle a ni.

Mipui hian kan ram hi kan vei a, hnathawh ṭha lo kan do ngam a, huaisen taka ke kan pen ngam chuan a dik lo zawk hi chu an tîm tur a ni a, Bualpui Ng pawh hian damdawi-in building ṭha zawk an neih phah ngei i beisei ang u.