Halpuah khapna leh kuhva lakluh khapna thupek

Mizoram sorkar chuan kum tina a tih ṭhin angin hunpui vuakvetah halpuah khapna thupek a chhuah a, Aizawl khawpuiah chuan police lamin bazar leh hmun hrang hrangah halpuah an dap a, eng emaw zat an man tawh bawk.

Hunpuia halpuah khap a nih hma hian kan sorkar hotu liante leh tlawmngai pawlte an inhmu khawm a, halpuah khap dan tur leh hmalak dan tur chik takin an ngaihtuah a, district hrang hrangah Bawrhsap lamin theihtawp an chhuah zui bawk. Khap rem vek theih ni lo mah se halpuah lakluh dang tur leh a lo lutte man ngei tura sorkar hmalakna hi a fakawm a, an ti tak tak tih hi hmuh hmaih theih a ni lo.

Myanmar aṭanga dan loa kuhva rah lakluh khap a nih dan aṭanga teh chuan kan sorkar hian halpuah hal hi a ngaimawh zawk hle niin a ngaih theih a; halpuah man tura ke a pen zatve ang tal pawh hian Mamit leh Kolasib district lama kuthnathawktute eizawnna tichhetu kuhva smuggling hi tihtawp tumin bei ni se, kuhva smuggling tihtawp tuma kan police-te chet dan hi mipuiin an hmu tur a nia!

Sorkar hian a duh leh tum tak tak chinah chuan mihring pawh a nei a, tha pawh a nei a, thawm na tak nen beihpui a thlak thei tih halpuah khap tuma a chet vel danah a lang. Hetiang bawk hian a man awlsam zawk, lirtheia langsar taka phurh, kudam-a an dah kuhva smuggling pawh hi bei tak tak se tihtawp theih loh tur a awm dâwn em ni le?