Sorkar office leh hnathawh

Vawiin, January 3 hi kum 2023 atana Mizoram sorkar hnuaia office hrang hrangte hnathawh ṭan leh hun a ni a, sorkar office bakah eizawnna dang thawktute pawhin an hna an ṭan leh hun tur a ni.

Hun pui kan hmang zo hlim hlawl a, eizawnna hna chhunzawm leh nghal mai hi a huphurhawm ṭhin a, mi tam tak chu hunpui ngaiin kan lung a la lêng a, hnathawh pawh kan phur lo ṭhin a ni.

Hetihlai hian mi tam tak chu thawh loa nghei thei reng dinhmunah an ding a, ṭhenkhat lah private hnuaia hnathawk an nih avangin an hotuten khauh takin hna chhunzawm nghal turin an chah ngei ang a, mahni hna kan ṭan chho leh dâwn ta.

Hetiang hunah hian sorkar office lam hi an ṭan a ngai khawp a, an thawh leh thawh lohah hlawh ngai reng la an nih vang nge, hna ṭan tlai bîk hi an awm fo.

Sorkar hnathawk zingah chawlh hunlai boruaka châm rei fâla January thlà laihawl thlenga hnathawhna hmun la thleng loa zin bo te, hnathawk tura chhuak tlai em em leh thawk mang lo pawha inthlahrung lem lote an lo awm tawh ṭhin.

Sorkar hnathawk ṭhenkhat erawh hnathawh ni hmasa ber aṭanga thawk nghal chat mai, rinawm leh taima taka hna thawk ṭhin an awm bawk.

Kum 2023-ah hian Mizoram sorkar hnathawk zawng zawngin a hma aia hun vawn dik leh thawh ṭhat tum thei se, he kum thar hian danglamna ṭha tak a thlen thei dâwn si a.